Møte i Barn og unge sitt kommunestyre den 01.11.2023

Vedtak

Innkalling og saksliste vert godkjent slik dei ligg føre.

Vedtak

Møteprotokollen vert godkjent slik den ligg føre.

Vedtak

Saka vert teken til orientering.

Behandling

Kommunedirektør, Janne Johnsen, orienterte kort om aktuelle saker, og sa mellom anna at budsjettet for 2024 og bygging av ny ungdomsskule er dei største sakene for tida.

Kommunalsjef helse og omsorg, Camilla Haug Flem, orienterte kort om helsetenestane i kommunen. Ho oppfordra representantane i barn og unge sitt kommunestyre om å gjere seg kjent med Digi Ung, som er ei digital teneste kor ein kan logge seg inn og bestille timar osb. hjå helsestasjonen. Ho oppfordra dei også til å tipse dei andre ungdommane frå 13 år og oppover om dette tilbodet.

Kommunalsjef samfunn og næring, Jone Fuglesten, orienterte om tenestane han har ansvar for. Det er mellom anna kulturtilbodet i kommunen og kommunale bygg, uteanlegg og vegar. Han fortalte at det er sett i gong eit arbeid med å gjera fiskerihamna ved elva utføre kommunehuset til eit kjekkare område å vera på, spesielt om sommaren.

Kommunalsjef oppvekst, Håvard Østhus, orienterte om oppvekstsektoren i Hjelmeland, som er barnehagane, skulane og flyktningtenesten. Det er kome 115 flyktningar dei siste to åra, noko som fører til nye elevar på skulane og nokon får også nye naboar. Det er gratis barnehage i Hjelmeland, dette er også eit ganske unikt tilbod, som er bra for småbarnsfamiliane. Håvard orienterte også kort om tilstandsrapporten for skulane i Hjelmeland, som vert presentert for kommunestyret snarleg.

SLT- og folkehelsekoordinator, Annbjørg Breiland, orienterte om at elevråda på skulane snarleg vil bli oppfordra til å sende kommunedirektøren innspel til kommunen sin trafikktryggingsplan. Ho orienterte også om at leiar og nestleiar er invitert til workshop på Høiland gard 6. november, kl. 1730 - 2000, for å arbeide med utviklingsplan for Rogaland 2025 - 2028.

Vedtak

Kornkanok (Focus) Schmidt vert valgt til leiar av Barn og unge sitt kommunestyre 2023 - 2024.

Sondre Mathisen vert valgt til nestleiar av Barn og unge sitt kommunestyre 2023 - 2024.

Behandling

Kornkanok (Focus) Schmidt vart valgt til leiar, ved skriftleg val. (15 stemmer + 4 blanke)

Sondre Mathisen vart valgt til nestleiar.

Det var ingen andre forslag.

Vedtak

Saka vert teken til orientering.

Behandling

Prosjektleiar, Eirin Eidem Meihack, orienterte om arbeidet med ny ungdomskule. 2. november skal kommunestyret avgjere om det skal byggast ny ungdomsskule eller om arbeidet skal utsetjast. Dersom det vert utsett tek det sannsynlegvis ca. 2 år lengre. Dersom dei seier ja til bygging må ein skrive kontrakt med dei som skal bygga og bestille brakker som elevane kan gå på skule i medan skulen vert bygd. Forhåpentlegvis er desse klar til innflytting etter påske 2024. Deretter startar ein arbeidet med å rive den eksisterande skulen, og deretter bygge den nye, noko ein reknar med vil ta ca. 2 år. Ein planlegg for at elevane kan starte på den nye ungdomsskulen hausten 2026.

Eirin viste også teikningar av den nye skulen, og forklarte desse for representantane.

Vedtak

Barn og unge sitt kommunestyre kjem med desse innspela til kommuneplanen sin samfunnsdel:

• Bedriftsbesøk på skulane
• Leikeplass/leikeland i kommunen
• Fornying/vedlikehald av Fister klubbhus
• Vedlikehald av barnehagar, skular og ballbingar.
• Restaurantar
• Tre barneskular i Hjelmeland kommune

I tillegg vert svara på Mentimeterundersøkinga om kommuneplanen, som representantane gjennomførte under temamøtet i forkant av barn og unge sitt kommunestyremøte, lagt ved protokollen.

Behandling

Årdal skule:

• Arbeidsplassar: Bedrifter, som til dømes Årdal Aqua, bør få invitasjon om å kome på skulane for å informere om seg sjølv og kva ein kan jobba med på deira arbeidsplass.
• Leikeplass/leikeland: Bra for småbarnsfamiliane, spesielt i kombinasjon med gratis barnehage.

Fister skule:

• Fornying/vedlikehald av Fister klubbhus: Sosiale aktivitetar i nærområdet
• Vedlikehald av barnehagar, skular og ballbingar.
• Restaurantar: Møteplass, med prisar som gjer at også barn og ungdom har råd til å kjøpe mat
• Tre barneskular i Hjelmeland kommune: Kort reiseveg og færre elevar, noko som gjer det lettare å lære meir.

Vedtak

Barn og unge sitt kommunestyre kjem med desse innspela til budjettet for 2024:

• Busskur ved Årdal skule
• Pengar til å bruke på spel og aktivitetar, på området kor den gamle sykkelparkeringa på Årdal skule var.
• Solskjerming på utsida av klasseromma på Fister skule.
• Nytt skulekjøkken på Fister skule.
• Meir penger til kunst og handverk-faget og naturfag, slik at ein kan lage ulike ting og gjere fleire eksperiment.
• Kantine med varm mat på skulane, til dømes to gonger i veka.
• Gratis skulemat.
• Kunstgras/ballbinge på Hjelmeland barneskule
• Lage fleire uterom ved Hjelmeland barneskule
• Uværsskur/tak i skulegarden på Hjelmeland barneskule.
• Busskur på Hjelmeland skule.
• Padel-bane
• Leikeplass på Sande.
• Fortsetje med ungdomstaxi.
• Godt vedlikehold og reingjering på dei offentlege badeplassane.

Behandling

Årdal skule:

• Busskur ved skulen er viktig fordi det er for langt unna det ein har idag, ein rekk gjerne ikkje bussen. Det er berre eit lite tak no, og det er busshaldeplassen til mange som bur i området. Det vil koma til nytte for fleire enn dei som går på skulen. Det er mykje dårleg vær og eit busskur vil gje ly til både dei som ventar på buss og dei som leikar i området.
• Det er veldig kjekt å sjå at arbeidet med sykkelparkering er i gong. I den forbindelse ynskjer representantane pengar til å bruke på spel og aktivitetar, på området kor den gamle sykkelparkeringa har vore. Dette kan vera “vennebenk”, spel på veggen eller rett og slett berre ein ledig vegg som kan brukast til grafitti.

Fister skule:

• Solskjerming på utsida av klasseromma. Eksisterande solskjerming fungerer dårleg og har dårleg kvalitet.
• Nytt skulekjøkken bør få høg prioritering på budsjettet. Det er i svært dårleg stand og er vanskeleg å halde reint. Mat og helse-faget har krav til rommet, og det trengs rett utstyr til dette formålet.
• Det trengs meir penger til kunst og handverk-faget, slik at ein kan laga fleire ulike ting.
• Det trengs også meir utstyr til naturfag, slik at ein kan laga fleire ting og gjere fleire eksperiment.
• Fortsetje med ungdomstaxi, slik at foreldra slepp å hente barna og kan gjere kjekke ting sjølv.
• Det er viktig at toaletta på dei offentlege badeplassane vert vedlikehaldne og reingjorte. Dette er bra for å gje eit godt inntrykk til både fastbuande og dei som besøker kommunen.
• Kantine med varm mat fleire dagar i veka på skulane, til dømes måndag og fredag. Dette fremjar sunt kosthald og trivsel.

Hjelmeland barneskule:

• Leikeplass på Sande. Det kan vera ein uformell møteplass for mange, både småbarnsfamiliar og tilreisande.
• Gratis skulemat. Alle får ikkje skikkeleg frukost eller har næringsrik mat med på skulen - noko som er viktig for læring. Fellesmåltid skaper eit godt skulemiljø.
• Det hadde vore kjekt med kunstgras/ballbinge i staden for grusbane. No får elevane grus i augo og skadar seg oftare dersom dei fell.
• Padel-bane. Dette kan vera ein uformell møteplass, det gjev god folkehelse og passar for alle aldrar.
• Busskur på Hjelmeland skule. Det er trygt når nokon ventar på bussen, og det gjer ly i dårleg vær.
• Lage fleire uterom ved Hjelmeland barneskule, både til undervisning, friminutt og andre ting. Skuleeigar ynskjer meir uteskule, og det er lettare å gjere det i eit uterom når det er dårleg vær. Gapahuken er god å ha, men er nedslitt.
• Uværsskur/tak i skulegarden på barneskulen. Alle har ikkje gode uteklede, men då kan dei vere i uværsskuret - både når det er dårleg vær eller for å finne skugge på varme dagar.